Raj Thackeray | Power Corrupts…; राज ठाकरेंची पोस्ट व्हायरल! अमित साटम प्रकरणावर सरकारला घेरलं

मुंबईतील अलीकडील पावसाळी दुर्घटनांवरून राज्यातील राजकीय वातावरण पुन्हा तापले आहे. मनसे अध्यक्ष राज ठाकरे यांनी भाजप आमदार अमित साटम यांच्या कथित वर्तनावर तीव्र नाराजी व्यक्त करत मुख्यमंत्री देवेंद्र फडणवीस यांना थेट सवाल उपस्थित केले आहेत. सोशल मीडियावर केलेल्या पोस्टमधून त्यांनी राज्य सरकारच्या भूमिकेवर कठोर टीका केली आहे.

राज ठाकरे यांनी म्हटले आहे की, मुंबईतील संवेदनशील दुर्घटनांमध्ये निष्पाप नागरिकांचा मृत्यू झाला असताना त्यावर एका लोकप्रतिनिधीने हसणे ही अत्यंत असंवेदनशील बाब आहे. अशा वर्तनावर अद्याप कोणतीही कारवाई झाली नसल्याने सत्ताधाऱ्यांमध्ये सत्तेचा माज वाढल्याचे चित्र दिसत असल्याचा आरोप त्यांनी केला.

यावेळी त्यांनी महाराष्ट्राच्या राजकीय संस्कृतीबाबतही चिंता व्यक्त केली. देशभरात महाराष्ट्राच्या सुसंस्कृत, संयमी आणि संवेदनशील राजकारणाचा आदर्श दिला जात होता. मात्र, गेल्या काही वर्षांत राज्यातील राजकीय संस्कृती खालावत असून, ती इतर काही राज्यांप्रमाणे असंवेदनशील होत चालल्याची खंत त्यांनी व्यक्त केली.

मुख्यमंत्री देवेंद्र फडणवीस यांच्यावर निशाणा साधताना राज ठाकरे म्हणाले की, लोकांच्या मृत्यूवर हसणाऱ्या लोकप्रतिनिधीवर कोणतीही कारवाई होत नसल्याने चुकीचा संदेश जात आहे. मुख्यमंत्री मौन बाळगत असल्यामुळे सत्ताधारी नेते अधिक बेफाम होत असल्याचा आरोपही त्यांनी केला.

राज ठाकरे यांनी आपल्या पोस्टमध्ये प्रसिद्ध इंग्रजी वाक्याचा उल्लेख करत, “Power tends to corrupt, and absolute power corrupts absolutely,” या परिस्थितीचे उदाहरण सध्याच्या सत्ताधाऱ्यांच्या वर्तनातून दिसत असल्याची टीका केली. तसेच, मंत्र्यांच्या बेताल विधानांवर आणि लोकप्रतिनिधींच्या असंवेदनशील वर्तनावर कठोर कारवाई झाली नाही, तर राज्यात चुकीचे पायंडे पडतील, असा इशाराही त्यांनी दिला.

दरम्यान, राज ठाकरे यांच्या या वक्तव्यानंतर मुंबईतील पावसाळी दुर्घटना, सत्ताधाऱ्यांची भूमिका आणि राजकीय जबाबदारी यावरून नव्या राजकीय वादाला तोंड फुटले असून, मुख्यमंत्री देवेंद्र फडणवीस आणि भाजपकडून यावर काय प्रतिक्रिया येते, याकडे राज्याचे लक्ष लागले आहे.