Thackeray Demands LoP : विरोधी पक्षनेतेपद निवडीसंदर्भात ठाकरेंकडून भेटी-गाठी, राहुल नार्वेकर अन् राम शिंदेंसोबत चर्चा

उद्धव ठाकरे यांनी विरोधी पक्षनेतेपदाच्या निवडीसंदर्भात महत्त्वपूर्ण भेटी घेतल्या. त्यांनी प्रथम विधानसभा अध्यक्ष राहुल नार्वेकर यांची भेट घेतली. या भेटीत सुमारे अर्धा तास चर्चा झाली. या भेटीनंतर उद्धव ठाकरे यांनी राम शिंदे यांचीही भेट घेतली. दोन्ही सभागृहांत विरोधी पक्षनेते नियुक्त करण्याची मागणी उद्धव ठाकरे यांनी यावेळी केली. जर विरोधी पक्षनेतेपद दिले जात नसेल, तर उपमुख्यमंत्री पदेही रद्द करावीत, अशी स्पष्ट भूमिका उद्धव ठाकरेंनी मांडली. ठाकरेंनी यासंदर्भात आपले म्हणणे अधिक स्पष्ट करताना सांगितले की, “दोन्ही सभागृहांना विरोधी पक्षनेते लाभणे ही आमची विनंती किंवा आग्रह आहे. अधिवेशनाच्या वेळेला लवकरात लवकर निर्णय घेऊ असा शब्दप्रयोग गेल्या अधिवेशनावेळीही झाला होता. आता हा निर्णय किती लवकर होतो हे पाहणे महत्त्वाचे आहे.” त्यांनी उपमुख्यमंत्री पदावर प्रश्नचिन्ह उपस्थित केले. “संख्याबळ हा जर विरोधी पक्षनेतेपदासाठी नियम असेल, तर उपमुख्यमंत्री पदाला संख्याबळाचा आधार नाही,” असे ते म्हणाले.

ते पुढे म्हणाले की, “काही ठिकाणी तर असेच नेमले गेलेले आहेत आणि एकेक नाही, तर दोन-दोन उपमुख्यमंत्री आहेत. मग तुम्ही उद्या चाळीस-चाळीस उपमुख्यमंत्री कराल. उपमुख्यमंत्री ही संज्ञा चुकीची आहे, ती कायद्यातच बसत नाहीये. जर विरोधी पक्षनेते पदाला संख्याबळाचे अडकाठी असेल, तर उपमुख्यमंत्री पदाला कशाचाच आधार नाही.” या माध्यमातून ठाकरेंनी सत्ताधाऱ्यांवर कायदेशीर आणि नैतिकतेच्या मुद्द्यांवरून टीकास्त्र सोडले आहे.