अहमदनगर (Ahmednagar Lok Sabha constituency)

अहमदनगर दक्षिण मतदारसंघ अत्यंत संवेदनशील मतदारसंघ आहे. या मतदारसंघात विधानसभेचे सहा मतदारसंघ येतात. एक खासदार तीन आमदारांसह भाजपचं प्राबल्य आहे.  अहमदनगर दक्षिण मतदारसंघ हा खरा तर अघाडीचा बालेकिल्ला. सहकार साखर कारखानदारी, दूध व्यवसाय, शिक्षण संस्था आणि सहकाराचा घट्ट जाळं या मतदारसंघात आहे. मात्र खासदार दिलीप गांधी यांनी गटबाजीचा फायदा घेत भाजपाचं खातं खोललं. गेल्या दोन टर्मपासासून त्यांनी खासदारकी भूषवली.

हा जिल्हा ऐतिहासिक, धार्मिक, शैक्षणिक, सांस्कृतिक, पर्यटन असा विविधतेने नटलेला आहे.  महत्वाचे म्हणजे सहकाराची पंढरी म्हणून या जिल्ह्याची ओळख आहे. त्याचबरोबर सह्याद्रीच्या पर्वतरांगा, कळसूबाई शिखर, हरिषचंद्र गड, चांदबिबीचा महाल, पट्टा किल्ला अशी ऐतिहासिक स्थळे तर शिर्डी, शनिशिंगणापूर, मोहटा देवी अशी धार्मिक तिर्थस्थळे या जिल्ह्यात आहेत.

नगर जिल्ह्यातील राजकारण सरळ नावाला विसंगत असंच आहे. इथे नेहमीच राजकीय उलथापालथी होत असतात. कोणत्याही निवडणुका आल्या की जिल्ह्यातील समीकरणे अगदी चुटकीसरशी बदलतात. यंदाच्या लोकसभा निवडणुकीत तेच पाहायला मिळालं. आगामी विधानसभा निवडणुकीतही तेच होण्याची शक्यता आहे.

अहमदनगर लोकसभा मतदारसंघामध्ये शेवगाव, राहुरी, पारनेर, नगर शहर, श्रीगोंदा, कर्जत-जामखेड या 6  तर शिर्डी लोकसभा मतदारसंघामध्ये अकोले,  संगमनेर,  शिर्डी,  कोपरगाव, श्रीरामपूर आणि नेवासा या 6 विधानसभा मतदारसंघांचा समावेश आहे.