सातारा (satara lok sabha constituency)

राजकीयदृष्ट्या महाराष्ट्राचा विचार केला, तर पहिल्यापासून सातारा जिल्ह्याची ओळख राष्ट्रवादीचा बालेकिल्ला अशी राहिली आहे. राष्ट्रवादीच्या स्थापनेपासूनच या जिल्ह्यावर राष्ट्रवादी काँग्रेसची पकड राहिली. गेल्या 2 टर्म छत्रपती उदयनराजे भोसले हेच राष्ट्रवादीकडून खासदार म्हणून निवडून आले होते. तिसऱ्यांदा लोकसभा निवडणुकीच्या मैदानात उतरल्यावरही उदयनराजे भोसले विजयी झाले. पण त्यानंतर त्यांनी काही महिन्यातच राष्ट्रवादीला सोडचिठ्ठी दिली आणि भाजपमध्ये आले. त्यानंतर झालेल्या पोटनिवडणुकीत उदयनराजे यांचा पराभव झाला होता. राष्ट्रवादीचे श्रीनिवास पाटील विजयी झाले होते. 

मतदानाची आकडेवारी लक्षात घेतली, तर 2014 च्या तुलनेत 2019 मध्ये सातारा लोकसभा मतदारसंघात 3.33 टक्यांनी मतदान वाढले होते. सातारा लोकसभा मतदारसंघात 2014 मध्ये 57% मतदान झाले, तर 2019 मध्ये 60.33% मतदान झाले होते. सातारा लोकसभा मतदारसंघात सहा विधानसभा मतदारसंघ येतात. त्यात वाई, कोरेगाव, कराड उत्तर, कराड दक्षिण, पाटण आणि सातारा विधानसभा मतदारसंघांचा समावेश आहे. 

लोकसभा निवडणुकीची भाजपची महाराष्ट्रातील यादी जाहीर झाली आहे. पण त्यात साताऱ्याची उमेदवारी जाहीर करण्यात आलेली नाही. त्यामुळे उदयनराजे यांना तिकीट मिळणार की नाही? असा प्रश्न निर्माण झाला आहे. तसेच उदयनराजे यांना तिकीट न मिळाल्यास साताऱ्यातून भाजपचा उमेदवार कोण असेल याचाही सस्पेन्स वाढला आहे.