Nashik, Ahilyanagar, Jalgaon, Dhule, Malegaon Election Results 2026 LIVE: लोकशाहीच्या महाकुंभाचा आशीर्वाद कुणाला? नाशिक महापालिकेचे झटपट निकाल काही तासात!
Nashik, Ahilyanagar, Jalgaon, Dhule, Malegaon Election Results 2026 LIVE Counting in Marathi: राज्यातील 29 महानगरपालिकांच्या निवडणुकीचा निकाल आज (शुक्रवार, 16 जानेवारी) सकाळी 10 वाजल्यापासून हाती येणार आहे. उत्तर महाराष्ट्रातील नाशिक, अहिल्यानगर, जळगाव, धुळे आणि मालेगाव महापालिकांचा निकाल जाणून घेण्यासाठी हा ब्लॉग फॉलो करा.
LIVE NEWS & UPDATES
-
Jalgaon Mahapalika Election Results: गुंडगिरीची सखोल चौकशीची मागणी करणार, आमदार अनिल पाटील यांचा शिरीष चौधरींवर हल्लाबोल
शिरीष चौधरी आणि त्यांच्या कार्यकर्त्यांच्या नंदुरबार इथल्या हाणामारी तसंच दाखल गुन्ह्यावरून आमदार अनिल पाटील यांनी निशाणा साधत तीव्र शब्दात टीका केली आहे. नंदुरबार इथं शिरीष चौधरी यांच्याविरुद्ध दाखल गुन्हेसंदर्भात मुख्यमंत्री, उपमुख्यमंत्री, पोलीस महानिरीक्षक यांची भेट घेणार असल्याचं अनिल पाटील म्हणाले. इतकंच नव्हे तर गुंडगिरीची सखोल चौकशी करण्याची मागणी करणार असून विधानसभेत आवाज उठवणार असल्याचंही ते म्हणाले.
-
Jalgaon Mahapalika Election Results: शिरीष चौधरी यांच्यावर अनिल पाटील यांची खोचक टीका
जळगावच्या अमळनेर इथल्या शिवसेना शिंदे गटाचे माजी आमदार शिरीष चौधरी यांच्यावर अजित पवारांच्या राष्ट्रवादीचे आमदार अनिल पाटील यांनी खोचक टीका केली आहे. शिरीष चौधरी हे दहशतीचं राजकारण करत असून नंदुरबार आणि अमळनेरमधल्या जनतेसाठी घातक असल्याची टीका आमदार अनिल पाटील यांनी केली आहे. गुंड प्रवृत्तीला नेतृत्व देऊन अमळनेरचं नुकसान करू नका, असं आवाहन जनतेला करत जनता तुम्हाला माफ करणार नाही असा सूचक इशारा अनिल पाटील यांनी शिरीष चौधरींना दिला आहे.
-
-
Nashik Mahapalika Election Results: नाशिकमधील 122 जागांसाठी 155 टेबलवर होणार मजमोजणीची प्रक्रिया
नाशिक महापालिकेसाठी गुरुवारी मतदान झाल्यानंतर आज मतमोजणी होणार आहे. एकूण 122 जगासाठी 155 टेबलवर मतमोजणीची प्रक्रिया होणार आहे. एका प्रभागासाठी तीन टेबलवर मतमोजणी होणार आहे. संपूर्ण मतमोजणीसाठी 465 कर्मचारी नियुक्त असतील. साधारणपणे दुपारपर्यंत चित्र स्पष्ट होण्याची शक्यता आहे. तर 2398 पोलीस कर्मचारी वेगवेगळ्या मतमोजणी केंद्रावर बंदोबस्तासाठी तैनात असतील.
-
Nashik Mahapalika Election Results: नाशिकमध्ये गेल्या वेळेच्या तुलनेत यंदा 5% कमी मतदान
गेल्या वेळेच्या तुलनेत नाशिकमध्ये यंदा पाच टक्क्यांनी मतदानाची टक्केवारी कमी झाली. नाशिक महापालिका निवडणुकीत यंदा 56.67 टक्के मतदान झालं. 2017 मध्ये 61.60 टक्के मतदान झालं होतं. घटलेल्या मतदानाचा फटका कोणाला बसणार हे पाहणं महत्त्वाचं ठरणार आहे.
-
Jalgaon Mahapalika Election Results: जळगावातील गोळीबाराच्या घटनेचा निवडणूक प्रक्रियेशी संबंध नाही- पोलीस
जळगाव महापालिकेत अत्यंत सुरळीतपणे मतदान प्रक्रिया पार पडली असून कुठलाही अनुचित प्रकार घडलेला नाही. जळगावमध्ये जी गोळीबाराची घटना घडलेली आहे, या घटनेशी कुठलाही मतदान निवडणूक प्रक्रियेशी संबंध नाही. ही घटना वैयक्तिक वादातून घडली आहे. या घटनेत कोणीही जखमी झालं नसून सध्या चौकशी सुरू असल्याचं अप्पर पोलीस अधीक्षक अशोक नखाते यांनी सांगितलं.
-
-
Jalgaon Mahapalika Election Results: प्रशासनाच्या चुकीमुळे 2 महिलांवर मतदानापासून वंचित राहण्याची वेळ
जळगाव शहरातील प्रभाग 1 मधील गेंदालाल मिल परिसरातील मतदान केंद्रावर दोन महिलांवर मतदानापासून वंचित राहण्याची वेळ आली. महिलांची नावं असूनही, मतदानाच्या वेळेत मतदान केंद्रावर प्रवेश करूनही, तसंच अडीच तास रांगेत उभं राहूनही दोन्ही महिला मतदानापासून वंचित राहिल्या आहेत.
महिलांना 18 व्या क्रमांकाच्या बूथचं टोकन दिलं, मात्र मतदान 15 क्रमांकाच्या बूथमध्ये होतं. तिथे गेल्यावर मतदान प्रक्रिया संपली होती. टोकन देण्यात घोळ झाल्याने मतदानाचा हक्क न बजावता आल्याचं सांगत दोन्ही महिलांनी नाराजी व्यक्त केली आहे.
-
Nashik Mahapalika Election Results: 2017 च्या निवडणुकीत भाजपला बहुमत
2017 मध्ये नाशिक महानगरपालिकेच्या 31 वॉर्डमधील 122 जागांसाठी निवडणूक पार पडली होती. त्या निवडणुकीत भाजपाने 64 जागांसह विजयी बहुमत प्राप्त केलं होतं. तर 32 जागांसह दुसऱ्या क्रमांकावर शिवसेना पक्ष राहिला होता.
-
-
Nashik Mahapalika Election Results: नाशिक महापालिकेच्या एक्झिट पोलचे अंदाज काय?
नाशिक महानगरपालिकेच्या निकालाकडे सर्वांचं लक्ष लागून आहे. त्याआधी गुरुवारी संध्याकाळी एक्झिट पोलचे अंदाज समोर आले. नाशिकमध्ये एकनाथ शिंदेंची शिवसेना सर्वात मोठा पक्ष ठरणार असल्याचा अंदाज आहे.
-
Dhule Mahapalika Election Results: धुळ्यात मतदान यंत्राची मोडतोड
धुळे महापालिका निवडणुकीदरम्यान प्रभाग क्रमांक 18 मधील मिरच्या मारुती प्राथमिक विद्यामंदिरातील मतदान केंद्रातील खोली क्रमांक एकमध्ये असलेल्या मतदान यंत्राची मोडतोड करण्यात आली. या घटनेनंतर संबंधित मतदान केंद्रावरील मतदान काही काळासाठी थांबवण्यात आलं होतं.
-
Mahapalika Election Results : राज्यातील 29 महापालिकांसाठी गुरुवारी सरासरी 60% मतदान
राज्यातील २९ महापालिकांसाठी गुरुवारी सरासरी ६०% मतदान झालं. जवळपास आठ ते दहा वर्षानंतर होणाऱ्या महापालिकांच्या निवडणुकांमुळे अनेक ठिकाणी मतदानात उत्साह दिसून आला.
राज्यातील 29 महापालिकांसाठी गुरुवारी मतदान झालं असून आज (शुक्रवार, 16 जानेवारी) 15,931 उमेदवारांचं भवितव्य ठरणार आहे. मुंबईसह 29 महानगरपालिकांमध्ये एकूण 2869 जागा आहेत. उत्तर महाराष्ट्रातील नाशिक, मालेगाव, जळगाव, धुळे आणि अहिल्यानगर या महानगरपालिकांचा निकाल या ब्लॉगच्या माध्यमातून जाणून घेता येईल. नाशिक महापालिकेत एकूण 31 प्रभाग असून यातून 122 उमेदवार निवडून येणार आहेत. तर मालेगाव महानगरपालिकेत एकूण 21 प्रभागातून 84 नगरसेवक निवडून येतील. अहिल्यानगर महापालिकेत 17 प्रभाग असून 68 सदस्य निवडून येणार आहेत. तर धुळ्यात एकूण 19 प्रभागातून 74 नगरसेवक निवडून येणार आहेत. जळगावातील एकूण 19 प्रभागातून 75 नगरसेवक निवडून येणार आहेत. या महानगरपालिकांमधील कोणते उमेदवार आघाडीवर, कोणते पिछाडीवर, कोणाच्या पदरी निराशा तर कोण उधळणार विजयाचा गुलाल.. या सर्वांचे अपडेट्स एका क्लिकवर जाणून घ्या..
Published On - Jan 16,2026 5:56 AM
