Maharashtra News LIVE : तेंदूपत्ता वेचणाऱ्या 4 महिलांवर हल्ला करणारी वाघीण अखेर जेरबंद
डोनाल्ड ट्रम्प यांच्या सुरक्षेत त्रुटी आणि व्हाईट हाऊसजवळ गोळीबार; मध्य रेल्वेची कसारा-कल्याण लोकल सेवा विस्कळीत; महाराष्ट्रात मान्सूनपूर्व पावसाचा यलो अलर्ट आणि 'नीट' पेपरफुटी प्रकरणी सीबीआयचा आरसीसी क्लासेसमध्ये तपास; वाचा सर्व महत्त्वाच्या घडामोडींचे लाईव्ह अपडेट्स एकाच ठिकाणी!
LIVE NEWS & UPDATES
-
अवकाळीच्या तडाख्यात उत्तर पुणे हादरलं; लाखणगावातील केळीच्या बागा जमीनदोस्त
उत्तर पुणे जिल्ह्यात अवकाळी पाऊस आणि वादळी वाऱ्याने भीषण थैमान घातले असून शेतकऱ्यांचे अतोनात नुकसान केले आहे. आंबेगाव तालुक्यातील लाखणगाव परिसरात ताशी वेगाने सुटलेल्या वादळामुळे लाखो रुपयांचा खर्च आणि प्रचंड मेहनत करून उभी केलेली केळीची पिके काही मिनिटांतच जमीनदोस्त झाली. केळीची झाडे मुळासकट उन्मळून पडल्याने हातातोंडाशी आलेले पीक पूर्णपणे नष्ट झाले आहे. मोठ्या कर्जाच्या विळख्यातून उभी केलेली बाग डोळ्यांदेखत उद्ध्वस्त झाल्याने येथील बळीराजा पूर्णपणे हवालदिल झाला असून, प्रशासनाने तात्काळ पंचनामे करून भरपाई द्यावी अशी मागणी केली जात आहे.
-
विदर्भात उष्णतेचा कहर कायम; तापमानात विक्रमी वाढ झाल्याने प्रशासनाकडून ॲडव्हायझरी जारी
विदर्भात उष्णतेचा कहर सुरूच असून हवामान विभागाने पुढील काही दिवसांसाठी रेड आणि ऑरेंज अलर्ट कायम ठेवला आहे. अकोला, अमरावती आणि वर्धा जिल्ह्यांमध्ये तीव्र उष्णतेची लाट येण्याची शक्यता असल्याने तेथे ‘रेड अलर्ट’ जारी करण्यात आला आहे, तर नागपूर आणि चंद्रपूर जिल्ह्यांना ‘ऑरेंज अलर्ट’ देण्यात आला आहे. या सतत वाढणाऱ्या भीषण उष्णतेमुळे विदर्भातील सर्वसामान्य जनजीवन पूर्णपणे विस्कळीत झाले आहे. परिस्थितीचे गांभीर्य ओळखून प्रशासनाने नागरिकांना दुपारच्या वेळी घराबाहेर पडणे टाळण्याचे आणि आवश्यक ती सर्व सावधगिरी बाळगण्याचे आवाहन करत वेगवेगळ्या मार्गदर्शक सूचना (Guidelines) जारी केल्या आहेत.
-
-
आदित्य ठाकरे आज नाशिक दौऱ्यावर, नगरसेवक आणि पदाधिकाऱ्यांची बांधणार मोट
शिवसेना ठाकरे गटाचे नेते आदित्य ठाकरे आज नाशिक जिल्ह्याच्या महत्त्वाच्या दौऱ्यावर आहेत. मध्यंतरीच्या काळात पक्षात झालेली पडझड आणि आगामी महानगरपालिका निवडणुकांच्या पार्श्वभूमीवर हा दौरा अत्यंत महत्त्वपूर्ण मानला जात आहे. काही दिवसांपूर्वीच मुख्यमंत्री एकनाथ शिंदे यांच्या शिवसेनेचे खासदार श्रीकांत शिंदे यांनी नाशिकचा दौरा केला होता, त्याला प्रत्युत्तर म्हणून आता आदित्य ठाकरे नाशिकमध्ये दाखल होत आहेत. या दौऱ्यादरम्यान ते स्थानिक माजी नगरसेवक, पक्षाचे पदाधिकारी आणि कार्यकर्त्यांशी संवाद साधून विविध बैठका घेणार आहेत, ज्यामुळे नाशिकमध्ये पक्षाची विस्कळीत झालेली मोट पुन्हा घट्ट बांधण्यास मदत होणार आहे.
-
घरात खेळता खेळता बाथरुममधील बादलीत पडली; नाशिकमध्ये 1 वर्षाच्या चिमुकलीने गमावला जीव
नाशिकच्या आडगाव परिसरातून एक अत्यंत काळीज पिळवटून टाकणारी दुर्दैवी घटना समोर आली आहे. घरात खेळत असताना बाथरुममधील पाण्याने भरलेल्या बादलीत पडून हिंदवी दत्तात्रय भोसले या अवघ्या एक वर्षाच्या चिमुकलीचा मृत्यू झाला. ही घटना निदर्शनास येताच तिला तात्काळ उपचारासाठी रुग्णालयात दाखल करण्यात आले, मात्र डॉक्टरांनी तपासून तिला मृत घोषित केले. या धक्कादायक घटनेमुळे परिसरात सर्वत्र हळहळ व्यक्त होत असून, आडगाव पोलीस ठाण्यात अकस्मात मृत्यूची नोंद करण्यात आली आहे.
-
नाशिक गुन्हे शाखेची नोटीस; एमआयएमचा नगरसेवक मतीन पटेल सोमवारी पोलिसांना शरण येणार!
आरोपीला आश्रय दिल्याप्रकरणी देवळाली कॅम्प पोलीस ठाण्यात गुन्हा दाखल असलेला एमआयएमचा (MIM) नगरसेवक मतीन पटेल अखेर सोमवारी नाशिक पोलिसांसमोर शरण येणार आहे. नाशिक गुन्हे शाखेचे पथक मतीन पटेलच्या शोधार्थ संभाजीनगरमध्ये गेले होते, मात्र तो मिळून आला नव्हता. अखेर या प्रकरणात दोषारोपपत्र (Charge sheet) दाखल झाल्यानंतर पोलीस पथकाने पटेलला नोटीस बजावली. ही नोटीस मिळताच मतीन पटेलने नरमाईची भूमिका घेतली असून, तो सोमवारी स्वतः नाशिक शहर पोलिसांसमोर हजर होणार असल्याची माहिती सूत्रांनी दिली आहे.
-
-
१० वी, १२ वीच्या ‘रिपीटर्स’ना फटका; पुरवणी परीक्षा शुल्कात वाढ!
महाराष्ट्र राज्य माध्यमिक व उच्च माध्यमिक शिक्षण मंडळाने दहावी आणि बारावीच्या पुनर्परीक्षार्थींसाठी एक महत्त्वाचा निर्णय घेतला आहे. जुलै-ऑगस्ट २०२६ मध्ये होणाऱ्या पुरवणी परीक्षांच्या शुल्कात वाढ करण्यात आली असून, यामुळे ‘रिपीटर्स’ आणि श्रेणीसुधार करू इच्छिणाऱ्या विद्यार्थ्यांना आता वाढीव शुल्काचा आर्थिक भार सोसावा लागणार आहे. या संदर्भातील सुधारित शुल्काचे विवरण राज्य मंडळाच्या सचिवांनी पत्राद्वारे सर्व विभागीय मंडळाच्या सचिवांना पाठवले आहे.
-
नागपुरात सूर्याचा प्रकोप, उष्माघाताने ४ जणांचा बळी गेल्याची शक्यता
नागपूर जिल्ह्यात गेल्या २४ तासांत तीव्र उष्णतेच्या लाटेमुळे चार जणांचा संशयास्पद मृत्यू झाल्याची धक्कादाक घटना समोर आली आहे. शनिवारी नागपूरचा पारा तब्बल ४५ अंश सेल्सिअसवर पोहोचला होता. या कडक उन्हामुळे नागपूर शहरातील सक्करदरा आणि यशोधरा नगर परिसरात दोन अज्ञात व्यक्ती बेशुद्ध अवस्थेत आढळल्या, तर सावनेर (ग्रामीण) भागातही दोघांचा मृत्यू झाला. प्राथमिक अंदाजानुसार हे मृत्यू उष्माघाताने झाल्याची शक्यता वर्तवली जात असली, तरी अचूक कारण शवविच्छेदन अहवालानंतरच स्पष्ट होणार आहे. या घटनेमुळे संपूर्ण जिल्ह्यात भीतीचे वातावरण पसरले आहे.
-
अमेरिकेचे राष्ट्राध्यक्ष डोनाल्ड ट्रम्प यांच्या सुरक्षेत पुन्हा मोठी त्रुटी निर्माण झाली आहे. व्हाईट हाऊसजवळ झालेल्या अंदाधुंद गोळीबारात २१ वर्षीय हल्लेखोर नासिरे बेस्ट सिक्रेट सर्व्हिसच्या प्रत्युत्तरादाखल केलेल्या गोळीबारात ठार झाला आहे; सुदैवाने ट्रम्प सुरक्षित आहेत. तर दुसरीकडे मुंबईत आसनगाव ते खडवली दरम्यान वीज पुरवठा खंडित झाल्यामुळे मध्य रेल्वेच्या कसारा-कल्याण मार्गावरील लोकल सेवा पहाटे १ ते दीड तास उशिराने धावत असल्याने प्रवाशांचे हाल झाले. हवामान विभागाच्या अंदाजानुसार, मॉन्सूनने अरबी समुद्र आणि अंदमान समुद्राच्या बहुतांश भागात आगेकूच केली असून पुढील आठवड्यात तो केरळमध्ये दाखल होईल, तर महाराष्ट्रातील कोकण, मध्य महाराष्ट्र आणि मराठवाड्यात पुढील ३-४ दिवस मेघगर्जनेसह मान्सूनपूर्व पावसाची शक्यता असल्याने ‘यलो अलर्ट’ देण्यात आला आहे. दरम्यान, वैद्यकीय क्षेत्राशी संबंधित ‘नीट’ पेपरफुटी प्रकरणी सीबीआयच्या पथकाने वेगाने तपासचक्रे फिरवत स्थानिक पोलीस अधीक्षकांची भेट घेतली असून, शहरात आज पुन्हा नामांकित आरसीसी क्लासेसमध्ये जाऊन कसून चौकशी सुरू केली आहे. यासह महाराष्ट्र , देश-विदेश, मनोरंजन, बिझनेस, क्रीडा क्षेत्रातील महत्वाच्या घडामोडींचे अपडेट तुम्हाला या ब्लॉगमध्ये वाचता येतील. दिवसभार फॉलो करा TV9 मराठीचा हा ब्लॉग..
Published On - May 24,2026 8:59 AM
