पैसे वाटपाचा धक्कादायक प्रकार! जळगावचा व्हिडीओ व्हायरल

जळगाव महापालिका निवडणुकीपूर्वी पैसे वाटप आणि नकली ईव्हीएमवर मतदानाचा डेमो घेतल्याचा एक धक्कादायक व्हिडीओ समोर आला आहे. या व्हायरल व्हिडीओमध्ये शिंदे गटाचे कार्यकर्ते मतदारांना पैसे वाटताना आणि त्यांना एका नकली ईव्हीएम मशीनवर मतदान कसे करायचे हे शिकवताना दिसत आहेत. पैसे दिल्यानंतर कोणत्या उमेदवाराला मतदान करायचे, हे स्पष्टपणे दाखवले जात असल्याचे फुटेजमध्ये दिसत आहे.

या प्रकारानंतर शिंदे गटाच्या शहरप्रमुख सरिता माळी यांनी दावा केला की, संबंधित महिलांना रोजंदारीवरील प्रचाराचे पैसे दिले जात होते. मात्र, रोजंदारीच्या पैशांसोबत डुप्लिकेट ईव्हीएमचा डेमो कशासाठी दिला जात होता, याचे समाधानकारक उत्तर त्यांनी दिले नाही. जळगावच्या प्रभाग 11 मधील हा व्हिडीओ असल्याची माहिती असून, ठाकरे गटासह इतर तीन अपक्ष उमेदवारांनी या प्रकरणी निवडणूक आयोगाकडे तक्रार केली आहे. या घटनेमुळे निवडणूक आयोगाच्या भूमिकेवर प्रश्नचिन्ह निर्माण झाले आहे, कारण यापूर्वीही कल्याण-डोंबिवली, नांदेड, लातूर आणि पनवेलमध्ये अशाच प्रकारच्या पैसे वाटपाचे व्हिडीओ समोर आले होते, परंतु त्यांच्यावर ठोस कारवाई झाल्याची माहिती उपलब्ध नाही.