माझ्या नादाला लागू नको! जरांगेंचा नाव न घेता धनंजय मुंडेंना इशारा

शिवजयंती उत्सवाच्या निमित्ताने मनोज जरांगे पाटील यांनी किल्ले शिवनेरीवर छत्रपती शिवाजी महाराजांना आदराने अभिवादन केले. यावेळी त्यांनी महाराष्ट्रातील जनतेला शिवजयंतीच्या शुभेच्छा दिल्या आणि महाराजांमुळेच आपल्याला सुख-समाधान मिळाल्याचे सांगितले.

या पवित्र दिवसाचे औचित्य साधून त्यांनी बीड जिल्ह्यातील प्रलंबित प्रकरणांवर तीव्र प्रतिक्रिया दिली. संतोष देशमुख आणि महादेव मुंडे यांच्या हत्या प्रकरणांचा उल्लेख करत त्यांनी असे अनेक प्रकरणे लवकरच बाहेर येतील असे सूचित केले. काही महिलांनी बीड जिल्ह्यातील नेत्यांकडून झालेल्या त्रासाची माहिती त्यांना दिल्याचेही त्यांनी नमूद केले.

जरांगे पाटलांनी माझ्या नादी लागू नको असा स्पष्ट इशारा नाव न घेता धनंजय मुंडेंना दिला. ते म्हणाले की त्यांच्याकडे 22 हून अधिक प्रकरणे आहेत, त्यापैकी तीन इतकी गंभीर आहेत की ती संबंधित व्यक्तीचे आयुष्य उद्ध्वस्त करू शकतात. तुझे साम्राज्य मी पायाखाली तुडवीन, अशा शब्दांत त्यांनी ताकीद दिली आणि लवकरच या प्रकरणांशी संबंधित पुरावे समोर आणण्याचे आश्वासन दिले.