Maharashtra Live News : दिल्लीतील जंतरमंतर तापलं, महिला पत्रकारांचे वरिष्ठ अधिकाऱ्यावर गैरवर्तनाचे आरोप, प्रकरण क्राईम ब्रँचकडे वर्ग

जालना शहराचा पाणी पुरवठा आजपासून तीन दिवस राहणार बंद

जालना शहराचा पाणी पुरवठा आजपासून 3 दिवस बंद राहणार आहे, कारण जालना जायकवाडी या योजनेच तांत्रिक काम अंबड आणि पैठण येथे होणार आहे त्याच बरोबर नवीन जलवाहिनी जोडण्याचं काम हाती घेण्यात येणार असल्याने 7 तारखेपर्यंत शहरातील पाणी पुरवठा बंद राहणार असल्याच जालना शहर महानगर पालिका प्रशासनाकडून सांगण्यात आलंय, त्यामुळे शहरातील नागरिकांनी पाण्याचा अपव्यय टाळावा आणि काटकसरीने त्याचा वापर करावा असं आवाहन पालिका प्रशासनाकडून करण्यात आलंय,दरम्यान तांत्रिक काम होऊन तीन दिवसात पाणी पुरवठा सुरळीत होणार का? हे पाहणं महत्वाचं ठरेलं..

कल्याणमध्ये मध्यरात्री फार्महाऊसवर पोलिसांची धाड; वाढदिवसाच्या पार्टीत सुरू होती हुक्का पार्टी

कल्याणमध्ये मध्यरात्री फार्महाऊसवर पोलिसांनी धाड टाकली. वाढदिवसाच्या पार्टीत सुरू असून तेथे हुक्का पार्टी करत असेलल्या  दोघांवर कारवाई करण्यात आली आहे.  टिटवाळा मानिवलीतील मिहीका फार्महाऊसवर वाढदिवसाची पार्टी सुरू असताना पोलिसांची अचानक धाड पडली. पहाटे 3.15 वाजता पोलिसांची एन्ट्री होताच हुक्का पार्टीत एकच धावपळ उडाली. सुगंधी तंबाखूजन्य पदार्थाचा हुक्का सेवन करणाऱ्या दोन इसमांवर पोलिसांनी थेट कारवाई केली. कल्याण तालुका पोलिस ठाण्यात COTPA कायद्यानुसार अदखलपात्र गुन्हा दाखल करण्यात आला. गुन्हा क्रमांक 3630/2026; कलम 4 आणि 21 अंतर्गत कारवाई, पुढील पोलिस तपास सुरू आहे.

एकनाथ शिंदे आज दिल्लीला जाण्याची शक्यता

एकनाथ शिंदे आज दिल्लीला जाण्याची शक्यता वर्तवण्यात येत आहे. पक्ष चिन्ह सुनावणी आणि काही महत्वाच्या कामांसाठी एकनाथ शिंदे हे दिल्लीत खासदार आणि वकिलांची भेट घेणार असल्याची माहीती समोर येत आहे.  एकनाथ शिंदे हे दिल्लीत महायूतीतल्या मोठ्या नेत्यांचीही भेट घेण्याची शक्यता आहे.

शिरूर तालुक्यातील पिंपरी दुमाला परिसरात चोरट्यांचा धुमाकूळ; मध्यरात्री तीन घरे फोडली!

शिरूर तालुक्यातील पिंपरी दुमाला परिसरात मध्यरात्री चोरट्यांनी तीन घरे फोडल्याची घटना समोर आली आहे. यामध्ये काही घरांतून रोख रक्कम, तर काही ठिकाणांहून इतर वस्तूंची चोरी करण्यात आल्याची प्राथमिक माहिती आहे. एकाच रात्री अनेक ठिकाणी चोरीच्या घटना घडल्याने परिसरातील नागरिकांमध्ये भीतीचे वातावरण निर्माण झाले आहे. आधीच दुष्काळाच्या संकटाचा सामना करणाऱ्या शिरूर तालुक्यात आता चोरीच्या घटनांमुळे नागरिकांच्या सुरक्षिततेचा प्रश्न ऐरणीवर आला आहे.

चोरट्यांचा बंदोबस्त करण्यासाठी पोलिसांनी तातडीने तपास करून संबंधितांवर कठोर कारवाई करावी, तसेच रात्रीची गस्त वाढवावी, अशी मागणी परिसरातील नागरिकांकडून होत आहे. या घटनांमुळे नागरिकांमध्ये चिंतेचे वातावरण असून, पोलिसांच्या पुढील कारवाईकडे सर्वांचे लक्ष लागले आहे.

पावसाने दडी मारल्याने नंदुरबारचा बळीराजा आर्थिक संकटात

पावसाने दडी मारल्याने नंदुरबारचा बळीराजा आर्थिक संकटात सापडला आहे.  गेल्या दोन महिन्यांपासून पावसाचा खंड पडल्याने  सोयाबीन पीक उद्ध्वस्त झालं आहे. पावसाअभावी सोयाबीनचे पीक अक्षरशः करपून गेले आहे. कापूस, मका, ज्वारीपाठोपाठ सोयाबीन पिकालाही मोठा फटका बसला आहे. पिकासाठी केलेला लाखोंचा खर्च डोळ्यासमोर वाया गेल्यामुळे   शेतकरी हवालदिल झाला आहे.  प्रशासनाकडून नुकसानीचे पंचनामे सुरू असून  तातडीने पंचनामे पूर्ण करण्याची मागणी करण्यात येत आहे.

उमरगा तालुक्यातील बोरी येथे पीक कंपनी प्रयोगाला आमदार प्रवीण स्वामी यांची उपस्थिती

धाराशिव जिल्ह्यात पावसाअभावी सोयाबीन उत्पादक शेतकरी मोठ्या संकटात सापडले आहेत. नारंगवाडी मंडळातील बोरी येथे करण्यात आलेल्या सोयाबीन कापणी प्रयोगात 10 बाय 5 मिटरच्या प्लॉटमध्ये अवघे ५१० ग्रॅम सोयाबीनचे उत्पन्न मिळाल्याने शेतीच्या नुकसानीची दाहकता समोर आली आहे. आमदार प्रवीण स्वामी यांनी प्रत्यक्ष उपस्थित राहून या कापणी प्रयोगाची पाहणी केली. पावसाचा खंड आणि हवामानातील बदलांमुळे सोयाबीन उत्पादकांचे मोठे नुकसान झाले आहे. त्यामुळे शेतकऱ्यांना तातडीने योग्य नुकसानभरपाई आणि पीकविम्याची मदत मिळावी, यासाठी शासनाकडे पाठपुरावा करणार असल्याची ग्वाही आमदार प्रवीण स्वामी यांनी दिली आहे.

सोलापूर जिल्ह्यात यंदाच्या वर्षी केवळ 2 लाख 27 हजार हेक्टर ऊस उपलब्ध

सोलापूर जिल्ह्यात यंदाच्या वर्षी केवळ 2 लाख 27 हजार हेक्टर ऊस उपलब्ध आहे.  जिल्ह्यातील तब्बल 32 हजार 948 हेक्टर क्षेत्र घटले आहे. त्यामुळे विविध कारखान्यांकडून उसाची पळवा पळवी होण्याची शक्यता आहे. त्यातच चाऱ्यासाठी मोठ्या प्रमाणात ऊस वापरला जाणार असल्याने उसाचा तुटवडा आणखी वाढणार असल्याचं सांगण्यात येत आहे.  तर दुसरीकडे दुष्काळामुळे ऊस वाढ फुटल्याने उत्पादकतेतही घट होणार आहे.

पर्यावरण संवर्धनाचा संदेश घेऊन ‘वसुंधरा पायी दिंडी’ नाणीजधामकडे रवाना

वसई:- पर्यावरण संवर्धन, स्वच्छता आणि सामाजिक बांधिलकीचा संदेश देत वसई वून रत्नागिरी जिल्ह्यातील श्रीक्षेत्र नाणीजधाम पर्यंत ‘वसुंधरा पायी दिंडी रवाना झाली आहे.  जगद्गुरू श्रीमद् रामानंदाचार्य नरेंद्राचार्य यांच्या संकल्पनेतून निघालेल्या या दिंडीत शेकडो महिला, मुली, पुरुष भाविक सहभागी झाले आहेत. विशेष म्हणजे, ग्लोबल वॉर्मिंगसारख्या गंभीर जागतिक समस्येकडे समाजाचे लक्ष वेधण्याचा प्रयत्न या उपक्रमातून केला जात आहे. केवळ जनजागृती न करता दिंडीच्या संपूर्ण व्यवस्थापनातून पर्यावरणपूरक आचरणाचा आदर्श निर्माण करण्यावरही भर देण्यात आला आहे.