हिंगोलीत कॉंग्रेसला खिंडार! प्रज्ञा सातव यांचा भाजपात प्रवेश
प्रज्ञा सातव यांनी चंद्रशेखर बावनकुळे आणि रवींद्र चव्हाण यांच्या उपस्थितीत भाजपमध्ये प्रवेश केला. स्वर्गीय राजीव सातव यांच्या हिंगोली विकासाचे स्वप्न पूर्ण करण्याचा आपला निर्धार असल्याचे त्यांनी सांगितले. देवेंद्र फडणवीस यांनीही हिंगोलीच्या विकासासाठी पूर्ण सहकार्य करण्याचे आश्वासन दिले आहे.
प्रज्ञा सातव यांनी नुकताच भारतीय जनता पक्षात (भाजप) प्रवेश केला आहे. हा प्रवेश भाजप नेते आणि महसूल मंत्री चंद्रशेखर बावनकुळे आणि पक्षाचे अध्यक्ष रवींद्र चव्हाण यांच्या उपस्थितीत झाला. प्रज्ञा सातव यांनी आपला हा निर्णय वैयक्तिक नाराजीमुळे नसून, स्वर्गीय राजीव सातव यांनी पाहिलेल्या हिंगोली जिल्ह्याच्या विकासाचे स्वप्न पूर्ण करण्यासाठी घेतला असल्याचे स्पष्ट केले.
चंद्रशेखर बावनकुळे यांनी आपल्या संबोधनात प्रज्ञा सातव यांच्या हिंगोलीसाठीच्या कार्याचे कौतुक केले. विधान परिषदेतील आमदार म्हणून त्यांनी देवेंद्र फडणवीस, नितीन गडकरी आणि रवींद्र चव्हाण यांच्यासोबत हिंगोलीच्या विकासाबाबत चर्चा केल्याचे सांगितले. पंतप्रधान नरेंद्र मोदी यांच्या विकसित भारताच्या संकल्पनेला अनुसरून हिंगोलीला विकासापासून दूर ठेवता येणार नाही, असाही त्यांनी उल्लेख केला. भाजप आणि देवेंद्र फडणवीस सरकार प्रज्ञा सातव यांच्या हिंगोली विकासाच्या संकल्पाला पूर्ण पाठिंबा देईल, असे आश्वासन बावनकुळे यांनी दिले.
