महादेवाची कावड घेऊन कार्यकर्ते आझाद मैदानात! पोलिसांकडून मात्र जरांगेंना नोटीस
मुंबईतील आझाद मैदानावर मनोज जरांगे पाटील यांचे मराठा आरक्षणासाठीचे आंदोलन सुरू आहे. पोलिसांनी त्यांच्या आंदोलनाची परवानगी नाकारली आहे आणि आझाद मैदान तात्काळ रिकामा करण्याचे आदेश दिले आहेत.
मुंबईतील आझाद मैदानावर मराठा आरक्षणासाठी मनोज जरांगे पाटील यांचे उपोषण आंदोलन सुरू आहे. आज या आंदोलनाचा पाचवा दिवस आहे. महादेवाची कावड घेऊन आंदोलक आझाद मैदानावर जमले आहेत. काल मुंबई उच्च न्यायालयात झालेल्या सुनावणीनंतर जरांगे पाटील यांच्या कोर्ट टीमने आझाद मैदान पोलिसांकडे आंदोलनाची परवानगी मागितली होती. मात्र, पोलिसांनी ही परवानगी नाकारली आहे. पोलिसांनी जरांगे पाटील यांना दिलेल्या नोटीसमध्ये अनेक गंभीर आरोप आहेत.
नोटीसीमध्ये असे म्हटले आहे की जरांगेंनी पाच हजार आंदोलकांची परवानगी घेतली असतानाही अधिक आंदोलक मुंबईत आणले. त्यांनी दक्षिण मुंबईतील रस्त्यांवर गाड्या पार्क करून जनजीवन विस्कळीत केले. आणखी लोक आणून मुंबईत चक्काजाम करण्याचा धमकीवजा इशारा दिला असल्याचा आरोपही आहे. आंदोलकांनी नियमांचे उल्लंघन करत रस्त्यावर अन्न शिजवले, कपडे काढून असभ्य वर्तन केले आणि सामाजिक स्वास्थ्याला धोका निर्माण केला असेही पोलिसांनी नोटीसमध्ये म्हटले आहे. जरांगेंनी दिलेल्या हमीपत्रात नमूद केलेल्या अनेक बाबींचे उल्लंघन झाल्याचे पोलिसांनी स्पष्ट केले आहे. पोलिसांनी आझाद मैदान तात्काळ रिकामा करण्याचे आदेश दिले आहेत. पाच हजार आंदोलकांना घेऊनही आंदोलन करता येणार नाही असे पोलिसांनी स्पष्ट केले आहे. जरांगे पाटील यांची पुढील भूमिका आणि पोलिसांची कारवाई काय असते हे पाहणे महत्त्वाचे आहे. आज दुपारी तीन वाजता या प्रकरणाची पुढील सुनावणी मुंबई उच्च न्यायालयात होणार आहे.
