Maharashtra News LIVE : अजित पवारांच्या अपघाती निधनाच्या मुद्द्यावर आज चर्चा? विधानसभेत सत्ताधारी आणि विरोधक आमनेसामने

नागपूरच्या आमदार निवास कॅन्टीनमधील गॅस पुरवठा अंशतः सुरळीत

नागपूर येथील आमदार निवासातील कॅन्टीनमध्ये निर्माण झालेला गॅसचा गंभीर तुटवडा आता काहीसा कमी झाला आहे. काही प्रमाणात सिलेंडर उपलब्ध झाल्याने दोन ते तीन दिवस पुरेल इतका साठा जमा झाला असून, आज सकाळचा नाश्ता वेळेवर तयार झाला आहे. महाराष्ट्र आणि देशभरातून येणाऱ्या १०० ते १५० पाहुण्यांची जेवण आणि नाश्त्याची सोय यामुळे काहीशी सुखकर झाली असली, तरी अद्याप आवश्यक तेवढा पुरवठा मिळालेला नाही. काल मिळालेल्या सिलेंडरवर सध्याचे काम रेटले जात असून, पूर्ण गरजेनुसार गॅस उपलब्ध नसल्याने प्रशासनाला अजूनही इतर पर्यायी व्यवस्था करावी लागत आहे.

गॅस पुरवठा सुरळीत करण्यासाठी नाशिक जिल्हाधिकारी कार्यालयाचा मोठा निर्णय

नाशिक शहरातील नागरिकांना गॅस पुरवठा सुरळीत व्हावा आणि वितरणातील अडथळे दूर व्हावेत, यासाठी जिल्हाधिकारी कार्यालयातील आपत्ती नियंत्रण कक्ष आता २४ तास खुला ठेवण्यात आला आहे. या कक्षात कर्मचारी विविध शिफ्टमध्ये काम करत असून, अनेक कर्मचारी रात्रपाळी करून गॅस वितरणाबाबत येणाऱ्या अडचणी सोडवत आहेत. गॅस पुरवठ्याशी संबंधित तक्रारी आणि मदतीसाठी नियंत्रण कक्षात सतत फोन येत असून, प्रशासन अत्यंत सक्रियतेने या समस्यांचे निराकरण करत आहे.

संगमनेरमध्ये अल्पवयीन मुलीवर ॲसिड हल्ला प्रकरण, घटनेच्या निषेधार्थ आज रास्तारोको आंदोलन

संगमनेर तालुक्यातील वडगावपान येथे सहावीत शिकणाऱ्या अल्पवयीन मुलीवर ॲसिड हल्ला झाल्याची घटना घडली आहे. या हल्ल्यानंतर आरोपी फरार झाला असून मुलीच्या चेहऱ्याच्या उजव्या बाजूला इजा झाली आहे..जखमी मुलीवर लोणी येथील प्रवरा ग्रामीण रुग्णालयात उपचार सुरू असून मुलीची प्रकृती स्थिर असल्याचे डॉक्टरांनी सांगितल आहे. आज मुलीच्या चेहऱ्यावर प्लास्टिक सर्जरी केली जाणार असल्याची माहिती देखील रुग्णालयाच्या वतीने देण्यात आली आहे. सध्या पोलिस आरोपीचा शोध घेत आहेत. या घटनेच्या निषेधार्थ आज वडगावपान ग्रामस्थांनी रास्ता रोको आंदोलनाची हाक दिली आहे.

अजित पवारांच्या अपघाती निधनाचा मुद्द्यावर आज चर्चा? विधानसभेत सत्ताधारी आणि विरोधक आमनेसामने

महाराष्ट्र राज्य विधिमंडळाच्या अर्थसंकल्पीय अधिवेशनाचा आज १७ वा दिवस असून, विधानसभेत आज २९३ च्या प्रस्तावावर सविस्तर चर्चा पार पडणार आहे. विशेषतः माजी उपमुख्यमंत्री अजित पवार यांच्या अपघाती निधनासंदर्भातील चर्चा अद्याप प्रलंबित असल्याने, आज या संवेदनशील विषयावर सभागृहात खडाजंगी होण्याची शक्यता वर्तवण्यात येत आहे. यासोबतच सत्ताधारी पक्षाने मांडलेल्या प्रस्तावावरही आजच चर्चा होणार असल्याने राजकीय वर्तुळाचे लक्ष आजच्या कामकाजाकडे लागले आहे.

गोंदियात भीषण अपघात, ट्रॅक्टरच्या धडकेत दुचाकीस्वाराचा जागीच मृत्यू

गोंदिया जिल्ह्यातील तिरोडा येथे एक हृदयद्रावक अपघाताची घटना घडली आहे. आपल्या पुतणीला घेण्यासाठी रेल्वे स्टेशनकडे दुचाकीने जात असलेल्या काकाचा भरधाव ट्रॅक्टरने धडक दिल्याने जागीच मृत्यू झाला. ही संपूर्ण भीषण घटना परिसरातील सीसीटीव्ही कॅमेऱ्यात कैद झाली असून, अपघाताचे दृश्य अंगावर शहारे आणणारे आहे. याप्रकरणी तिरोडा पोलिसांनी तातडीने कारवाई करत ट्रॅक्टर चालकाला अटक केली असून पुढील तपास सुरू केला आहे.

मेळघाटच्या हत्ती घाट बुरड घाट परिसरात भीषण वनवा

महाराष्ट्र मध्य प्रदेशच्या सीमेवर गेल्या 3 दिवसापासून आगीचा वणवा. प्रचंड धुराची लोट पसरल्याने वनविभागाचे आगीवर नियंत्रण मिळवण्यासाठी शर्तीचे प्रयत्न सुरू. सामाजिक कार्यकर्ते बंड्या साने यांनी सतर्कता दाखवत प्रशासनाचे लक्ष वेधले.. महाराष्ट्र आणि मध्य प्रदेशच्या सीमेलगत असलेल्या परिसरात आग लागल्याने आगीवर नियंत्रण मिळवण्यासाठी वनविभागाची धडपड

जळगावात राष्ट्रीय महामार्गावर आयशरची गव्हाने भरलेल्या ट्रॅक्टरला धडक

व्यवसायिक सिलेंडर अभावी महामार्गावरील हॉटेल पडतायेत बंद 

तपोवन वृक्षतोड प्रकरणी आज सुनावणी

मनसेचे शहर उपाध्यक्ष अॅड. नितीन पंडित यांनी यासंदर्भात न्यायालयात दाखल केली आहे याचिका. यापूर्वी नाशिक पालिकेने व राज्य सरकार यांना याचिकाकर्ते यांच्या अंतरिम अर्जावर प्रतिज्ञापत्र सादर नाही. त्यामुळे आज मनपा प्रतिज्ञापत्र सादर करणार का? याकडे पर्यावरणप्रेमींसह नाशिककरांचे लक्ष

धाराशिवच्या लोहारात अवकाळी पाऊस आणि गारपिटीचा शेतीला मोठा फटका

गारपिटीमुळे कलिंगडची शेती जमीन दोस्त. लिंबाच्या आकाराच्या गारा पडल्या शेतकऱ्याची माहिती. काढणीला आलेले कलिंगड गारपिटीच्या तडाख्यात शेतकऱ्याचं मोठं नुकसान. गारपिटीमुळे कलिंगडाला तडे, मार लागल्याने आत मध्येही कलिंगड डॅमेज जाग्यावरच सडतील

अवकाळी पावसाच्या धास्तीमुळे जालना जिल्ह्यातील शेतकऱ्यांकडून पिकांच्या काढणीला वेग

:हवामान विभागाकडून जालना जिल्ह्याला येत्या 20 तारखेपर्यंत अवकाळी पावसासह गारपीट होणार असल्याचा अंदाज वर्तवण्यात आल्याने जिल्ह्यातील शेतकऱ्यांकडून आता रब्बी हंगामातील गहू हरभरा आणि इतर पिकांच्या काढणीला वेग आला असून तशी लगबग पाहायला मिळत आहे.