महिला डॉक्टरच्या मृत्यूनंतर व्हॉट्सअ‍ॅप अ‍ॅक्टिव्ह, हैराण करणारी माहिती, आरोपींनी डेटा…

फलटण येथील महिला डॉक्टर संपदा मुंडे यांच्या आत्महत्येनंतर गंभीर आरोप केली जात असून ही आत्महत्या नव्हे तर हत्या असल्याचे सांगितले जातंय. दररोज या प्रकरणात धक्कादायक खुलासे होताना दिसत आहेत. संपदा मुंडे यांच्या कुटुंबियांनी नुकताच आता अत्यंत गंभीर आरोप केली आहेत. महिला डॉक्टरच्या मृत्यूनंतरही त्यांचा मोबाईल अनलॉक करण्यासाठी त्यांच्या फिंगरप्रिंटचा वापर केला आणि काही वेळ मोबाईल वापरण्यात आला. महिला डॉक्टरच्या मृत्यूनंतर बराच वेळ त्या व्हॉट्सअ‍ॅपवर ऑनलाईन दाखवत होत्या. त्यांच्या व्हॉट्सअ‍ॅप अकाउंटच्या लास्ट सीन स्टेटसवरुन असे स्पष्ट होतंय. महिला डॉक्टरने रात्री दीड वाजता आत्महत्या केल्याचे पोस्टमार्टम रिपोर्टमध्ये स्पष्ट सांगण्यात आलंय. मात्र, रात्री दीडनंतर पुढे कित्येक तास महिला डॉक्टरचा मोबाईल वापरला जात होता.

मृत्यूनंतरही सोशल मेसेजिंग अ‍ॅप अ‍ॅक्टिव्ह होते. त्यामुळे कोणीतरी अ‍ॅप वापरल्याचा संशय कुटुंबियांनी व्यक्त केला. एसआयटीची स्थापना करून सर्व संशयित आरोपींचे सीडीआर काढण्याची मागणी केली जात आहे. महिला डॉक्टरवर मोठ्या प्रमाणात राजकीय दबाव असल्याचा आरोप केला जात आहे. फलटण शहरात किरायाची रूम असताना देखील महिला डॉक्टरने दोन दिवसांसाठी हॉटेल बूक केल्याने मोठा संशय व्यक्त होतोय.

फलटणच्या उपजिल्हा रूग्णालयात वैद्यकीय अधिकारी म्हणून अनेक दिवसांपासून संपदा मुंडे या कार्यरत होत्या. विशेष म्हणजे त्या अत्यंत मेहनती असून 24 तास ड्यूटी करून पुढचे 24 तास ऑफ घेऊन अभ्यास करत. संपदा मुंडे यांनी आत्महत्या करण्याच्या अगोदर एक नोट हातावर लिहिली. त्यामध्ये त्यांनी पीएसआय गोपाळ बदने आणि प्रशांत बनकर यांच्या नावाचा उल्लेख केला असून पीएसआयने आपल्यावर चारवेळा बलात्कार केल्याचे स्पष्ट म्हटले.

यासोबतच प्रशांत बनकर हा संपदा मुंडे ज्याठिकाणी किरायाने राहत, त्या घराचा मालक होता. प्रशांत बनकरने शारिरीक आणि मानसिक त्रास दिल्याचे डॉक्टर मुंडे यांनी म्हटले. हेच नाही तर पीएसआय गोपाळ बदने याने आपला मोबाईल लपून ठेवला असून त्याचा शोध पोलिस घेत आहेत. पुढील काही दिवसात या प्रकरणात मोठे खुलासे होऊ शकतात. आता संपदा मुंडेच्या आत्महत्येनंतर तिचा मोबाईल नेमके कोण वापरत होते, हा प्रश्न उपस्थित केला जात आहे.