फलटण महिला डॉक्टर मृत्यू प्रकरण; तीन पेन ड्राईव्ह जप्त, फोटो, व्हिडीओ, स्क्रीन शॉट, बनकरच्या लॅपटॉपमध्ये काय-काय सांपडलं?
फलटण येथे एका महिला डॉक्टरने आपलं आयुष्य संपवलं, या प्रकरणानं राज्यभरात खळबळ उडाली आता या प्रकरणात महत्त्वाची माहिती समोर आली आहे. न्यायालयानं या प्रकरणातील दोन्ही आरोपींच्या पोलीस कोठडीत दोन दिवसांची वाढ केली आहे.
सातारा जिल्ह्यातल्या फलटणमध्ये एका रुग्णालयात काम करणाऱ्या एका महिला डॉक्टरने गळफास घेऊन आपलं आयुष्य संपवल्याची घटना घडली आहे, तीने एका हॉटेलमध्ये गळफास घेतला. या घटनेनं संपूर्ण राज्यभरात वातावरण चांगलंच तापलं. दरम्यान या महिला डॉक्टरने मृत्यूपूर्वी आपल्या तळहातावर एक सुसाईड नोट लिहिली होती, ज्यामध्ये तीने निलंबीत पीएसआय गोपाळ बदाने आणि प्रशांत बनकर यांच्यावर गंभीर आरोप केले होते. प्रशांत बनकरकडून आपला मानसिक तसेच शारीरिक छळ सुरू होता, तर गोपाळ बदाने याने आपल्यावर चार वेळा अत्याचार केला असा आरोप या पीडितेनं आपल्या सुसाईड नोटमध्ये केला होता. या सुसाईडनोटमुळे खळबळ उडाली आहे.
दरम्यान या प्रकरणातील दोन्ही आरोपींना पोलिसांनी अटक केली आहे, तपास सुरू आहे. आरोपींची पोलीस कोठडी संपल्यानं त्यांना पुन्हा एकदा न्यायालयात हजर करण्यात आलं, न्यायालयानं या दोन्हीही आरोपींच्या पोलीस कोठडीमध्ये दोन दिवसांची वाढ केली आहे. या प्रकरणात सरकारी वकील म्हणून क्षमा बांदल यांनी कोर्टात युक्तिवाद केला तर आरोपी गोपाळ बदाने याच्या वतीनं वकील राहुल धायगुडे यांनी यावेळी युक्तिवाद केला.
कोर्टात नेमकं काय घडलं?
पोलिसाकडून संशयित आरोपी प्रशांत बनकर आणि पीएसआय गोपाळ बदाने यांच्या चौकशीसाठी आणखी पाच दिवसाची पोलीस कोठडी मागण्यात आली आहे. गोपाळ बदाने याच्या घराची झडती घेतली असता पोलिसांनी 3 पेन ड्राईव्ह जप्त केले आहेत. गोपाळ बदाने याची डिजिटल पुराव्याची चौकशी बाकी आहे. पोलिसांच्या चौकशीमध्ये बदाने सहकार्य करत नाही, त्यामुळे त्याची पोलीस कोठडी वाढून द्यावी अशी विनंती सरकारी वकिलांकडून न्यायालयात करण्यात आली.
तसेच दुसरा संशयीत आरोपी प्रशांत बनकर याचा लॅपटॉप पोलिसांनी जप्त केला आहे, यामध्ये फोटो, व्हिडिओ, स्क्रीन शॉट मिळाले आहेत. त्यामुळे प्रशांत बनकरच्या पोलीस कोठडीत देखील वाढ करावी. सर्वात महत्त्वाचं म्हणजे या दोघांचे नाव मृत डॉक्टर महिलेने हातावर लिहिलं होतं, त्यामुळे आरोपींची आणखी चौकशी सुरू आहे. मृत डॉक्टरच्या हातावरील हस्ताक्षर त्यांचं नाही असा दावा करण्यात येत आहे, मात्र या प्रकरणावर हस्ताक्षर तज्ज्ञांचा अहवाल येणं बाकी आहे, तोपर्यंत आरोपींच्या पोलीस कोठडीमध्ये वाढ करण्यात यावी असा युक्तिवादही यावेळी सरकारी वकिलांकडून करण्यात आला.
दरम्यान दुसरीकडे आरोपी गोपाळ बदाने याच्या विकांनी युक्तिवाद करताना असा दावा केला की, हॉटेलमध्ये मृत डॉक्टराच्या हातावरील सुसाईड नोट कोणीही बघितली नाही. पण पोस्टमार्टम रूममध्ये हातावर सुसाईड नोट असल्याचे दिसून आले, हे कसे शक्य आहे? मुळात सुसाईड नोट मधील अक्षर हे मृत महिला डॉक्टरचे नाही, असं त्यांच्या नातेवाईकांचं म्हणणं आहे. मग यांना कोणत्या आधारावर अटक केली. ज्या ग्राउंड वर पोलीस कस्टडी मागितली, त्याचा तपास सुरू आहे, त्यामुळे आता सेम ग्राउंडवर 5 दिवसाची पोलीस कोठडी देता येणार नाही. एकीकडे फोन मधील चॅटचे विश्लेषण सुरू आहे, अस म्हणता. मग अधिक तपास करण्यासाठी वेळ कशाला पाहिजे? असा सवाल यावेळी आरोपीच्या वकिलांकडून करण्यात आला, त्यानंतर न्यायालयानं दोन्ही आरोपींना दोन दिवसांची पोलीस कोठडी सुनावली आहे.
