Rain: घड्याळात 4 वाजताच येथे सुरू होतो मुसळधार पाऊस, आजही चुकला नाही शिरस्ता, ही जागा कोणती?

4 O’Clock Rain: अल निनो, सुपर अल निनोमुळे भारतात यंदा सूर्य आग ओकत आहे. राज्यात विदर्भासह अनेक भागात उष्णतेच्या झळांनी नागरीक हैराण झाले आहेत. तर त्यातच आता अवकाळी पाऊस येण्याचा अंदाजही वर्तवला जात आहे. पण जगातील या भागात पाऊस न चुकता 4 वाजता हजेरी लावतो, हे सांगितले तर तुमचा विश्वास बसणार नाही. कोणते आहे हे ठिकाण?

पाऊस न चुकता येतो नियमित

जगाच्या काही भागात निसर्ग चमत्कार दाखवतो. काही भागात वाळवंट, तर काही भागात पाणीच पाणी, पण जगात असे ठिकाण आहे जिथे नियमित पाऊस पडतो. म्हणजे घड्याळात जेव्हा 4 वाजतात, तेव्हा या ठिकाणी पावसाला सुरुवात होते. या भागात तुम्ही दुपारी 3 वाजेनंतर गेलात तर तुम्हाला पावसाचा सामना करावा लागतो. हा निसर्गाचा चमत्कार अनुभवण्यासाठी मात्र मोठी कसरत करावी लागते.

कोणते आहे हे ठिकाण

भूमध्य रेखा पृथ्वीच्या मधोमध गेल्याचे मानले जाते. ती एक काल्पनिक रेषा आहे. पृथ्वीला दोन हिश्यात विभागते. उत्तर आणि दक्षिण गोलार्ध तयार होतो. याच पट्ट्यातील ॲमेझॉन आणि कांगो बेसिन या भागात चार वाजेच्या सुमारास थंडगार हवा सुरू होतात. एकाएक आभाळ भरून येते. काळे ढग पावसाचा सांगावा घेऊन येतात आणि पापणी लवते न लवते तोच पाऊस कोसळायला सुरुवात होते. संध्याकाळपर्यंत पावसाने हा प्रदेश रोज चिंब चिंब होतो. पावसाचं आणि इथल्या जंगलाचं जणू अतूट नातं आहे.

या प्रदेशात दोन गोष्टी अत्यंत खास आहे. या भागात सूर्य रोज कोपतो. तर दुपारनंतर पाऊस थंडावा देतो. सूर्याची किरणं थेट अंगाची लाहीलाही करतात. दिवसभर ऊन असते. तापमान वाढते. त्यामुळे समुद्रातील आणि नद्यातील पाण्याचे बाष्पीभवन होते. वाफ उंच जाते. पण उंचावर जाताच थंड वाऱ्यामुळे पाऊस पडायला सुरुवात होते. अगदी थोड्याच वेळात मुसळधार पाऊस पडतो. दुपारी 3 ते 5 या काळात पावसाचे आगमन होते. रोज येणाऱ्या या पावसाला ‘4 O’Clock Rain’ असे म्हटले जाते. भूमध्य रेषेच्या दोन्ही बाजूच्या प्रदेशात हा पाऊस अनुभवणे हे चमत्काराशिवाय कमी नाही.