DC vs KKR : फिन एलनचं वादळी शतक, केकेआरचा विजयी चौकार, दिल्लीचा 8 विकेट्सने धुव्वा
Delhi Capitals vs Kolkata Knight Riders Match Result and Highlights IPL 2026 : कोलकाता नाईट रायडर्सने दिल्ली कॅपिट्ल्सला पराभूत करत 19 व्या मोसमात विजयी चौकार लगावला आहे. फिन एलन हा चौथ्या विजयाचा हिरो ठरला आहे.
फिन एलन याने षटकारासह नाबाद शतक करुन कोलकाता नाईट रायडर्सला आयपीएल स्पर्धेच्या 51 व्या सामन्यात विजयी केलं आहे. केकेआरने यजमान दिल्ली कॅपिट्ल्सचा घरच्या मैदानात अरुण जेटली स्टेडियममध्ये एकतर्फी फरकाने धुव्वा उडवला आहे. दिल्लीने पाथुम निसांका याच्या अर्धशतकी खेळीच्या जोरावर केकेआरसमोर 143 धावांचं आव्हान ठेवलं होतं. केकेआरने हे आव्हान 8 विकेट्स राखून आणि 34 बॉलआधी पूर्ण केलं. केकेआरने 14.2 ओव्हरमध्ये 2 विकेट्स गमावून 147 धावा केल्या. केकेआरचा हा एकूण आणि सलग चौथा विजय ठरला. तर दिल्ली कॅपिट्ल्सचा घरच्या मैदानात सलग पाचवा पराभव ठरला.
केकेआरची बॅटिंग
कॅप्टन अजिंक्य रहाणे आणि फिन एलन या सलामी जोडीने 143 धावांचा पाठलाग करताना केकेआरला आश्वासक सुरुवात मिळवून दिली. दोघांनी पहिल्या विकेटसाठी 29 धावांची भागीदारी केली. मात्र त्यानंतर अजिंक्य आणि अंगकृष रघुवंशी ही मुंबईकर जोडी दुर्देवीरित्या आऊट झाली. अजिंक्य नॉन स्ट्राईक एंडवर रन आऊट झाला. अजिंक्यने 9 बॉलमध्ये 13 रन्स केल्या. तर अंगकृष रघुवंशी बोल्ड झाला. अंगकृषला 1 धाव करुन मैदानाबाहेर जावं लागलं. त्यामुळे केकेआरची 3.4 ओव्हरमध्ये 2 आऊट 31 अशी स्थिती झाली.
तिसऱ्या विकेटसाठी नाबाद शतकी भागीदारी
त्यानंतर फिन एलन आणि कॅमरुन ग्रीन या जोडीने कमाल केली. या दोघांनी तिसऱ्या विकेटसाठी नाबाद शतकी भागीदारी करुन केकेआरला विजयी केलं. फिन आणि ग्रीन या दोघांनी 64 बॉलमध्ये 116 रन्सची नॉट आऊट पार्टनरशीप केली. कॅमेरुनने 27 बॉलमध्ये 122.22 च्या स्ट्राईक रेटने नॉट आऊट 33 रन्स केल्या. कॅमरुनने या दरम्यान 2 सिक्ससह लगावले.
तसेच फिन एलन हा केकेआरच्या विजयाचा हिरो ठरला. एलनने 47 बॉलमध्ये 212.77 च्या स्ट्राईक रेटने नाबाद 100 धावा केल्या. फिनने या दरम्यान 10 षटकार आणि 5 चौकार लगावले. दिल्लीसाठी अक्षर पटेल याने एकमेव विकेट मिळवली.
स्कोअरकार्ड
दिल्लीची बॅटिंग
त्याआधी केकेआरने टॉस जिंकून दिल्लीला बॅटिंगसाठी भाग पाडलं. दिल्लीला केकेआरसमोर 20 ओव्हरमध्ये 8 विकेट्स गमावून 142 धावांपर्यंतच पोहचता आलं. दिल्लीसाठी पाथुम निसांका याने सर्वाधिक 50 धावा केल्या. आशुतोष शर्मा याने 39 आणि केएल राहुल याने 23 धावांचं योगदान दिलं. तर इतरांपैकी एकालाही दुहेरी आकडा गाठता आला नाही. केकेआरकडून अनुकूल रॉय आणि कार्तिक त्यागी या दोघांनी प्रत्येकी 2-2 विकेट्स मिळवल्या.
