संपदा मुंडे प्रकरणी डीवायएसपी-डीन यांना सहआरोपी करा; करुणा शर्मांची मागणी

संपदा मुंडे यांना न्याय मिळवून देण्यासाठी सध्या संपूर्ण महाराष्ट्रात आंदोलन सुरू आहे. या प्रकरणी करुणा शर्मा यांनी डीवायएसपी आणि हॉस्पिटलच्या डीन यांना सहआरोपी करण्याची मागणी केली आहे. संपदा मुंडे यांनी यापूर्वीच डीवायएसपी आणि डीन यांच्याकडे तक्रार केली होती, असे करुणा शर्मा यांनी म्हटले आहे. पोस्टमार्टम अहवाल आणि फिटनेस रिपोर्ट बदलण्यामागे असलेल्या “मोठ्या व्यक्ती”चा शोध घेऊन सखोल चौकशी व्हावी, अशी त्यांची मागणी आहे. ही आत्महत्या होती की हत्या, याचा तपास होणे आवश्यक आहे. सरकारने विशेष तपास पथक (एसआयटी) स्थापन केले असले तरी, खासदार निंबाळकर यांच्याविरोधात असलेले पुरावे एसआयटीने जाहीर करावेत, अशी अपेक्षा करुणा शर्मा यांनी व्यक्त केली.

मुख्यमंत्र्यांना क्लीन चिट देण्याचा अधिकार नसून, न्यायव्यवस्थेवर जनतेचा विश्वास असल्याचेही त्यांनी स्पष्ट केले. बीड जिल्ह्यातील सहा आमदार आणि पालकमंत्र्यांनी या प्रकरणात लक्ष घालून संपदा मुंडे यांना न्याय मिळवून देण्यासाठी मदत करावी, असे आवाहनही त्यांनी केले. रुपाली चाकणकर यांनी संपदा मुंडे यांच्या चारित्र्यावर चिखलफेक केली असून, जोपर्यंत त्यांचा राजीनामा होत नाही, तोपर्यंत स्वराज्य शक्ती सेना आणि करुणा धनंजय मुंडे गप्प बसणार नाहीत, असा इशाराही त्यांनी दिला.