Mukesh Ambani : अदानींना अंबानींच्या व्याह्यांचे आव्हान, ‘ या’ सरकारी कंपनीच्या खरेदीसाठी बोली; कोण मारणार बाजी?
गेल्या वर्षी डिसेंबर महिन्यात केंद्र सरकराने 100 टक्के भागीदारी विक्रीच्या निर्णयावर मोहोर उमटविली होती. कंपनीच्या खरेदीसाठी प्रारंभीच्या टप्प्यावर सात बोलीदार पुढे सरसावले होते.
नवी दिल्ली– केंद्र सरकारनं सार्वजनिक क्षेत्रातील कंपन्यांच्या खासगीकरणाला (PRIVATISATION) गती दिली आहे. आरोग्य उत्पादन क्षेत्रातील सरकारी कंपनी एचएलएल लाईफकेअर मधील भागीदारी विक्रीचा केंद्रानं निर्णय घेतला आहे. गेल्या वर्षी डिसेंबर महिन्यात केंद्र सरकराने 100 टक्के भागीदारी विक्रीच्या निर्णयावर मोहोर उमटविली होती. कंपनीच्या खरेदीसाठी प्रारंभीच्या टप्प्यावर सात बोलीदार पुढे सरसावले होते. दरम्यान, एचएलएलच्या खरेदीसाठी गौतम अदानी (GAUTAM ADANI) व मुकेश अंबानीचे व्याही उद्योजक अजय पिरामल (AJAY PIRAMAL) यांच्यामध्ये रस्सीखेच सुरू असल्याचं वृत्त आहे. एचएलएल लाईफकेअर लिमिटेड (HAL LIFECARE LIMITED) ही भारतीय आरोग्य सेवा उत्पादन क्षेत्रातील कंपनी आहे. कंपनीचे संपूर्ण संनियंत्रण भारत सरकारच्या अखत्यारित आहे. गर्भनिरोधक उत्पादने, महिलांच्या आरोग्यविषयक उत्पादनांची निर्मिती एचएलएलच्या माध्यमातून केली जाते. एचएलएलच्या खरेदीत कोण बाजी मारणार याकडं अर्थवर्तृळाचं लक्ष लागलं आहे.
अदानी की पिरामल?
अदानी समूहानं सिमेंट क्षेत्रातील आघाडीच्या होल्सिम कंपनीमधील तब्बल 81,000 कोटी रुपयांच्या भागीदारीचा व्यवहार नुकताच पू्र्ण केला आहे. त्यामुळे अदानी समूह रुग्णालये, ऑनलाईन व डिजिटल फार्मसीच्या अधिग्रहणाद्वारे आरोग्य क्षेत्रात पाऊल टाकण्याच्या विचारात आहे. याउद्देशानं अदानी हेल्थ व्हेंचर्स लिमिटेडचे गठन करण्यात आले आहे. अदानी हेल्थच्या माध्यमातून आरोग्य सेवा क्षेत्रात कंपनीचा कार्यप्रवेश होईल. वैद्यकीय तपासणी व संनियंत्रणासोबतच आरोग्य क्षेत्राच्या संबंधित सेवा, संशोधन संस्था आदींची निर्मिती करणार आहे.
अदानी ग्रूपची ब्लॉकब्लस्टर डील
अदानी ग्रुपने सिमेंट व्यवहार क्षेत्रात मोठं पाऊल टाकलं आहे. अदानी ग्रूपने जगातील आघाडीची सिमेंट कंपनी होल्सिम ग्रुपच्या अधिग्रहणाचा व्यवहार करार पूर्ण केला आहे. अदानी ग्रूपने भारतातील सर्वात मोठ्या दोन सिमेंट कंपन्या अंबुजा सिमेंट Ambuja Cement आणि एसीसी ACC मधील होल्सिम ग्रुपची संपूर्ण भागीदारी 10.5 अरब डॉलरला (80,800 करोड़ रुपये) खरेदी करण्याच्या व्यावसायिक कराराला अंतिम स्वरुप दिलं आहे. अदानी ग्रूपद्वारे पूर्णत्वास गेलंलं आजवरचं सर्वात मोठं अधिग्रहण मानलं जातं.
पिरामल ग्रूपचं आव्हान-
पिरामल ग्रुप हा एक भारतीय बहुराष्ट्रीय व्यवहारात सक्रिय असलेला समूह आहे. आरोग्य सेवा, जीवन विज्ञान, औषध शोध, आरोग्य सेवा माहिती व्यवस्थापन, वित्तीय सेवा आणि रिअल इस्टेट यांसारख्या विविध क्षेत्रात पिरामल समूहाने मोठ्या प्रमाणात प्रकल्प हाती घेतले आहेत. एचएलएलच्या निमित्तानं अदानी ग्रूपसमोर पिरामलचं तगडं आव्हान असणार आहे.
