लग्नच नको, पुरुष सर्वकाही हिरावून घेतात..; 51 वर्षांची अमिषा पटेल असं का म्हणाली?

‘कहो ना प्यार है’ या पहिल्याच चित्रपटातून अभिनेत्री अमिषा पटेल लोकप्रियतेच्या शिखरावर पोहोचली. अभिनेता हृतिक रोशनसोबत तिने बॉलिवूडमध्ये पदार्पण केलं होतं. या चित्रपटानंतर दोघांनाही असंख्य स्थळं येऊ लागली होती. एकीकडे हृतिकने त्याच वर्षी सुझान खानशी लग्न केलं होतं. तर दुसरीकडे अमिषा आज वयाच्या 51 व्या वर्षीही सिंगलच आहे. आता एक्स (ट्विटर) अकाऊंटवर ‘आस्क मी एनिथिंग’ या सेशनदरम्यान अमिषाने तिच्या लग्नाबद्दल स्पष्ट प्रतिक्रिया दिली आहे. या सेशनदरम्यान एका चाहत्याने तिला विचारलं, ‘तू लग्न कधी करणार आहेस?’ त्यावर ती म्हणाली, “कधीच नाही. मी एकटी खूप खुश आहे. माझे कुटुंबीय आणि अत्यंत जवळचा मित्रपरिवार असे 100 लोक माझ्या आयुष्यात आहेत, जे माझ्यावर खूप प्रेम करतात. त्यामुळे एका परक्या व्यक्तीने येऊन माझ्यापासून हे सर्व हिरावून घ्यावं किंवा बदलून टाकावं, हे मला अजिबात सहन होणार नाही.”

याआधी एका पॉडकास्टमध्ये अमिषाने तिचा एक अनुभव सांगितला होता. “जे तुमच्यावर खरंच प्रेम करतात, ते तुमच्या करिअरला पुढे घेऊन जातात. मी माझ्या करिअरसाठी आणि प्रेमासाठी खूप काही गमावलंय. मी दोन्ही गोष्टींचा एकमेकांसाठी त्याग केला आहे आणि आता त्यातूनच मी खूप काही शिकले आहे. चित्रपटसृष्टीत काम करण्यापूर्वी मी एका सीरियस रिलेशनशिपमध्ये होती. तो दक्षिण मुंबईतील एका मोठ्या बिझनेसमन कुटुंबातील होता. सर्वकाही ठीक होतं, पण जेव्हा मी फिल्म इंडस्ट्रीत काम करण्याचा निर्णय घेतला, तेव्हा मला समजलं की माझ्या पार्टनरला प्रसिद्धीच्या झोतात राहणारी महिला आवडत नाही. त्यामुळे मी प्रेमाऐवजी करिअरला निवडलं”, असं अमिषाने सांगितलं.

लग्नासाठी पूर्ण नकारात्मक नसल्याचंही तिने पुढे स्पष्ट केलं. ती पुढे म्हणाली, “मला योग्य व्यक्ती भेटल्यास मी नक्की लग्न करेन. जिथे इच्छा असते, तिथे मार्ग सापडतो.. असं म्हणतात. त्यामुळे जी व्यक्ती मला प्रत्येक अडथळ्यांमधून पार करत माझं मन जिंकेल, ती व्यक्ती माझा जोडीदार असेल. मला आजही संपन्न कुटुंबातून स्थळं येतात. माझ्यापेक्षा अर्ध्या वयाची लोकं मला डेटवर नेऊ इच्छितात. त्यासाठी मी तयार आहे.”

आजवर अमिषा पटेलचं नाव विविध कलाकारांसोबत जोडलं गेलं, परंतु 2000 दशकाच्या सुरुवातीला निर्माता विक्रम भट्टसोबतचं तिचं अफेअर सर्वाधिक चर्चेत राहिलं. पाच वर्षांच्या रिलेशनशिपनंतर त्यांचं ब्रेक झालं.