Girija Oak: त्या निळ्या साडीचं काय केलंस? गिरीजा ओक स्पष्टच बोलली ‘त्यावर लोणच्याची बाटली..’
Girija Oak blue saree: अभिनेत्री गिरीजा ओकचा निळ्या साडीतील लूक तुफान व्हायरल झाला होता. त्यानंतरच तिला 'नॅशनल क्रश'चा टॅग मिळाला होता. आता त्या निळ्या साडीचं काय केलंस, असा प्रश्न विचारला असता गिरीजा म्हणाली..
‘अशी ही बनवाबनवी’मधल्या ‘लिंबू कलर’च्या साडीनंतर जर देशभरात कोणती साडी लोकप्रिय ठरली असेल तर ती म्हणजे गिरीजा ओकची ‘निळी साडी’. याच निळ्या साडीने गिरीजाला ‘नॅशनल क्रश’चा टॅग मिळवून दिला होता. विशेष म्हणजे ही कोणती भरजरी किंवा अत्यंत महागडी नाही नव्हती. साध्या कॉटनच्या निळ्या साडीत गिरीजा ओकचं सहजसुंदर सौंदर्य खुलून दिसलं होतं. मुलाखतीची एक क्लिप सोशल मीडियावर व्हायरल झाली आणि क्षणार्धात ‘निळ्या साडीतील’ ही अभिनेत्री कोण, अशी चर्चा सुरू झाली. आता त्या निळ्या साडीचं काय केलंस, असा प्रश्न गिरीजाला नुकत्याच एका मुलाखतीत विचारण्यात आला. यावर उत्तर देताना गिरीजा अक्षरश: पोट धरून हसली.
काय म्हणाली गिरीजा?
‘राजश्री मराठी’ला दिलेल्या मुलाखतीत गिरीजा म्हणाली, “मी नाही सांगणार ती साडी कुठे आहे? कारण आम्ही जर सांगितलं की ती साडी कुठे आहे, तर ती सगळेच मागतील. सगळे म्हणतात की तुम्ही आमच्या प्रॉडक्ट्सची जाहिरात करा, पण ती साडी नेसून करा. माझ्या मॅनेजरने इतक्या लोकांना म्हटलंय की नाही जमणार. सगळीकडे गिरीजा फक्त निळ्या साडीतच फिरतेय. एका पॉईंटला तो माझा युनिफॉर्म झाला होता. दोन-तीन वेळा मी असंही म्हटलं होतं की तुम्ही एक काम करा, ती निळी साडी घेऊन जा आणि त्यावर प्रॉडक्ट्स ठेवून जाहिरात करा. कारण ती साडी प्रसिद्ध आहे, मी नाही. मी हवी असेन तर दुसऱ्या रंगाची साडी नेसून येते.”
हे सर्व सांगताना गिरीजाला हसू अनावर झालं होतं. याविषयी ती पुढे म्हणाली, “तुम्हाला असं वाटेल की काय बावळट लोकं आहेत. पण असंच असतं. एखादी गोष्ट चालू लागली की कोणालाच प्रयोग करायचे नसतात. जसं आहे तसंच राहू द्या, असं लोकांना वाटतं. त्यात बदल केले की सगळं ढासळून पडेल. आता गिरीजाला घ्यायचं तर ती निळी साडीच पाहिजे. काही जाहिराती मी ती साडी नेसूनच केल्या, पण त्यानंतर माझं असं झालं की, यापुढे मी हे करू शकत नाही. तुम्ही सरळ निळी साडीच घ्या, त्यात गुंडाळून लोणच्याची बाटली ठेवा. त्यामुळे ती साडी कुठे आहे, हे मी कोणालाच सांगणार नाही. पण ती साडी कोणाची आहे, हे मी नक्की सांगेन. प्रिया बापटच्या सावेंची या ब्रँडची ती साडी आहे. प्रियानेच मला ती साडी त्या मुलाखतीला नेसून जाण्यासाठी दिली होती. पण ती मुलाखत व्हायरल झाल्यानंतर जवळपास 50-60 ब्रँड्सचे मला मेसेज आले की ही आमची साडी आहे. तर संधीचा फायदा असा घ्यायचा असतो.”
