आयपीएल स्पर्धेत पाच संघांकडून खेळले पाकिस्तानी खेळाडू, बंदीनंतरही अझहर महमूदला घेतलं; कारण..
इंग्लंडमधील द हंड्रेड लीग स्पर्धेत काव्या मारनच्या सनरायझर्स लीड्स संघाने पाकिस्तानच्या अबरार अहमदला संघात घेतलं. त्यामुळे भारतीय क्रीडाप्रेमींमध्ये संतापाची लाट आहे. यापूर्वी एक वेळ अशी होती की आयपीएलमध्ये पाकिस्तानी खेळाडू खेळले आहेत. चला जाणून घेऊयात...
इंग्लंडच्या द हंड्रेड 2026 लीग स्पर्धेपूर्वी झालेल्या लिलावात काव्या मारन यांच्या मालकीच्या सनरायझर्स लीड्स संघाने अबरार अहमदला विकत घेतलं. त्यासाठी 1.90 लाख पाउंड मोजले. त्यामुळे भारतीय क्रीडाप्रेमींनी नाराजी व्यक्त केली आहे. दहशतवादाला प्रोत्साहन देणाऱ्या देशाच्या खेळाडूला घेतल्याने संतापाची लाट उसळली आहे. पहलगाम हल्ल्यानंतर भारताने पाकिस्तानसोबतचे सर्व संबंध मोडले आहेत. इतकंच काय तर आयसीसी स्पर्धेत हातही मिळवत नाही. आशिया कप स्पर्धेत पाकिस्तानी मोहसिन नक्वीकडून ट्रॉफी घेण्यासही नकार दिला. त्यामुळे पाकिस्तानवर किती राग आहे हे दिसून येतं. पण जेव्हा भारत पाकिस्तान यांच्यात चांगले संबंध होते तेव्हा आयपीएलच्या पाच फ्रेंचायझीकडून पाकिस्तानी खेळाडू खेळले आहेत.
आयपीएलच्या पहिल्या पर्वात कोलकाता नाईट रायडर्स संघाकडून 4 पाकिस्तानी खेळाडू खेळले आहे. सौरव गांगुलीकडे कर्णधारपद होतं आणि या संघात वेगवान गोलंदाज शोएब अख्तर होता. तसेच सलमान बट, उमर गुल आणि मोहम्मद हाफीज हे खेळाडू होते. आयपीएलच्या पहिल्या पर्वात राजस्थान रॉयल्स संघात पाकिस्ताने 3 खेळाडू खेळले आहेत. यात सोहेल तनवीर, विकेटकीपर उमरान अकमल आणि दिग्गज फलंदाज यूनिस खान यांचा समावेश आहे. तनवीर या पर्वात पर्पल कॅप मिळाली होती. तसेच राजस्थान रॉयल्स चॅम्पियन ठरला होता.
पाकिस्तानचा अष्टपैलू आणि विस्फोटक फलंदाज शाहिद आफ्रिदीला हैदराबादचा जुना संघ डेक्कन चार्जर्सने विकत घेतलं होतं. या संघात एडम गिलख्रिस्ट, अँड्रू सायमंड आणि हर्षल गिब्ससारखे आक्रमक फलंदाज होते. रॉयल चॅलेंजर्स बंगळुरुनेही पहिल्या पर्वात पाकिस्तानचा एक खेळाडू घेतला होता. मिस्बाह उल हकला संघात स्थान दिलं होतं.
किंग्स इलेव्हन पंजाब आणि आताच्या पंजाब किंग्स संघाने पहिल्या पर्वात तर पाकिस्तानी खेळाडू घेतला नाही. पण पाकिस्तानी खेळाडूंवर बंदी घातल्यानंतर तीन वर्षांनी अष्टपैलू अझहर महमूदला घेतलं. पण तेव्हा महमूदने पाकिस्तान सोडला होता आणि इंग्लंडची नागरिकता घेतली होती. त्यामुळे त्याला आयपीएल खेळण्याची संधी मिळाली. महमूद 2012 आणि 2013 मध्ये पंजाबकडून खेळला. त्यानंतर 2015 मध्ये कोलकाता संघाकडून खेळला.
