Murder : ‘तिला कायमचं विसर’ प्रेयसीच्या वडिलांची धमकी न जुमानता तो म्हणाला ‘शक्यच नाही!’

उत्तर प्रदेश : ऑनल किलिंगसारखा धक्कादायक प्रकार उत्तर प्रदेशच्या बिजनौरमध्ये समोर आला आहे. एका मुलीच्या वडिलांनी तिच्या प्रियकराला घरी बोलवलं. नंतर त्याची हत्या केली. शेवटी त्याचा मृतदेह नदीकिनारी जंगलात फेकून दिला. शिवाय पोलिसांना संशय येऊ नये म्हणून मुलीच्या वडिलांनी तिलाही जखमी केलं. हत्या करण्यात आलेल्या तरुणानेच आपल्या मुलीवर हल्ला केल्याचं भासवण्यासाठी मुलीच्या वडिलांनी हा प्रकार केल्याचं पोलिसांच्या तपासातून समोर आलं आहे.

मुलाची हत्या करण्याआधी तरुणाला मुलीच्या वडिलांना खोटा बहाणा करुन घरी बोलावून घेतलं होतं. तू तिला कायमचं विसरुन जा, असा धमकी वजा इशाराही दिला होता. पण तरुणाने नकार दिल्याने वडिलांनी आपल्या मुलांच्या साथीने तरुणाची हत्या केली. हत्या करण्यात आलेल्या तरुणाचं नाव इंद्रजित असल्याचं समोर आलं आहे.

हे हत्याकांड बिजनौर येथील दारानगर गंज इथं घडलं. इंद्रजित नावाच्या तरुणाचं शेजारी राहणाऱ्या आणि दहावीत शिकणाऱ्या मुलीवर प्रेम होतं. एका वर्षापासून इंद्रजित या मुलीच्या प्रेमात होता. अखेर एक दिवस मुलीच्या वडिलांनी शेजारी राहणाऱ्या इंद्रजितला बहाणा करुन घरी बोलावलं.

घरी आल्यानंतर इंद्रजितला मुलीच्या वडिलांनी तिला विसरुन जा, असं सांगितलं. तिचा विचार मनातून कायमचा काढून टाक, असा सल्लाही दिला. पण इंद्रजित प्रेमात आकंठ बुडाला होता. त्याने मुलीच्या वडिलांच्या धमकीला भीक घातली नाही.

इंद्रजित सांगूनही ऐकत नाही, हे पाहून मुलीच्या वडिलांच्या तळपायाची आग मस्तकात गेली. त्यांनी गळा आवळून इंद्रजितची जीव घेतला. आपल्या 3 मुलांच्या साथीने इंद्रजितची हत्या करुन त्याचा मृतदेह गंगा नदीच्या किनारी जंगलात फेकून दिला.

ही घटना 10 डिसेंबर रोजी घडली होती. इंद्रजितने आपल्या मुलीच्या छातीवर गोळी झाडून तो फरार झाला, असा बनाव मुलीच्या वडिलांनी रचला होता. पण हा कट अखेर उघडकीस आला. इंद्रजितची हत्या करुन मुलीच्या वडिलांना तिलाही जखमी केलं होतं. जखमी झालेल्या मुलीला वडिलांनी नंतर जिल्हा रुग्णालयातही उपचारासाठी दाखल केलं होतं. हे हत्याकांड रचणाऱ्या पित्याचं नाव राम असून पोलिसांनी त्यांना अटक केली आहे. आता याप्रकरणी पुढील तपास केला जातो आहे.