Mumbai Crime : भरदिवसा दरवाजा तोडून घरात घुसायचा, मग लाखोंचा ऐवज लुटून पसार व्हायचा !

मुंबई : भरदिवसा दरवाजा तोडून घरात चोरी करुन पसार होणाऱ्या चोरट्याला बेड्या ठोकण्यास बांगूर नगर पोलिसांना यश आले आहे. आरोपीकडून चोरी केलेले दागिने आणि रोख रक्कम जप्त केले आहेत. रईस अब्दुल आहद शेख असे अटक आरोपीचे नाव आहे. या आरोपींविरोधात मुंबईतील विविध पोलीस ठाण्यात 28 हून अधिक चोरीचे गुन्हे दाखल असल्याचे पोलिसांनी सांगितले. बांगूर नगर पोलिसांनी मालवणी परिसरात तंत्रज्ञान आणि कुत्र्याच्या मदतीने आरोपीला अटक केली. पोलीस आरोपीची चौकशी करत आहेत. आरोपीला अटक केल्यानंतर पुढील कार्यवाही सुरु आहे.

सीसीटीव्हीच्या मदतीने आरोपीची ओळख पटवली

आरोपीने बांगूर नगर परिसरातील अलका मल्होत्रा या महिलेच्या घरी चोरीची घटना घडली होती. चोरट्याने मल्होत्रा यांच्या घरातून 10 लाखांची रोकड आणि दागिने चोरुन नेले होते. याप्रकरणी मल्होत्रा यांनी बांगूर नगर पोलिसात चोरीची तक्रार दाखल केली होती. पोलिसांनी चोरीचा गुन्हा दाखल करत तपास सुरु केला. पोलिसांनी परिसरातील सीसीटीव्ही फुटेज तपासले.

घटनेच्या काही तासात आरोपीला अटक

सीसीटीव्हीवरुन आरोपीची ओळख पटवण्यास पोलिसांना यश आले. तपासादरम्यान आरोपी मालवणी परिसरात राहत असल्याची माहिती पोलिसांना मिळाली. त्यानुसार पोलिसांनी डॉग स्कॉडच्या मदतीने अवघ्या काही तासात आरोपीला मालवणी परिसरातून अटक केली. त्याच्याकडून चोरीचा मुद्देमाल जप्त केला आहे. पोलीस आरोपीची अधिक चौकशी करत आहेत. आरोपीने याआधी किती चोऱ्या केल्या, किती मुद्देमाल लंपास केला याबाबत पोलीस त्याची चौकशी करत आहेत.

अप्पर पोलीस आयुक्त राजीव जैन, पोलीस उपायुक्त अजयकुमार बंसल, सहाय्यक पोलीस आयुक्त रेणुका बागडे, वरिष्ठ पोलीस निरीक्षक प्रमोद तावडे, पोलीस निरीक्षक अरुण सावंत यांच्या मार्गदर्शनाखाली बांगुरनगर लिंक रोड पोलीस ठाण्याचे गुन्हे प्रकटीकरण अधिकारी सपोनि योगेश रामेकर, सपोफौ प्रमोद दळवी, पो.ह. राजेंद्र गळवे, पो.ना. विनय सोनावणे, पो.शि. संदिप तिकांडे, पो.शि. नईम शेख यांनी सदर कामगिरी पार पाडली.